ព្រុចសែល៖ នាយករដ្ឋមន្ត្រីកម្ពុជាសម្ដេចតេជោ ហ៊ុន សែន បានលើកឡើងថាសម្ដេចមិនមានជំនឿថាសង្គ្រាម ឬការគំរាមកំហែងប្រើសង្គ្រាមអាចនាំមកនូវសន្តិភាពនោះទេ។
សម្ដេចតេជោលើកឡើងបែបនេះក្នុងកិច្ចប្រជុំរំលឹកខួប៤៥ ទំនាក់ទំនងអាស៊ាន-សហភាពអឺរ៉ុប នៅទីក្រុងព្រុចសែល ថ្ងៃទី១៤ ខែធ្នូ ឆ្នាំ២០២២នេះ។
សម្ដេចតេជោថា៖ «ខ្ញុំមិនដែលជឿថា យើងអាចសម្រេចបាននូវសន្តិភាពតាមរយៈការធ្វើសង្គ្រាមឬការគំរាមបង្ករសង្គ្រាមនោះឡើយ»។
ក្នុងថ្ងៃនេះសម្ដេចតេជោបានរំលឹកឡើងវិញនូវការចរចា សន្ទនានិងពិគ្រោះយោបល់ដែលជាវិធីសាស្ត្ររួមរកដំណោះស្រាយបាន។
ពាក្យថា "ប្រសិនបើអ្នកចង់បានសន្តិភាព ត្រៀមខ្លួនសម្រាប់សង្រ្គាម" មកពីសៀវភៅ "Epitoma Rei Militaris" ដោយឧត្តមសេនីយ៍រ៉ូម៉ាំង Vegetius ហើយពាក្យនេះហើយដែលតំបន់អឺរ៉ុបចូលចិត្តប្រើប្រាស់ច្រើន និងបានអនុវត្តន៍ផងដែរ៕
